Vinarliga flytið 150 kr. skjótast gjørligt ella í seinasta lagi 1.sept., so sleppa vit undan at rykkja eftir gjaldinum.
Næsta gjald verður 1.feb.
Kontonummar: 6460-5870404.
Viðmerkið navnið á barninum.
Eg eri tøk á telefonini gerandisdagar kl.16-18 tlf. 742116
Góðu foreldur og avvarðandi.
Glyvrar 08. apríl 2024
Frá mikudegnum 10. apríl og tvær vikur farm er rokni- og lesiskeið á skránni í Glyvra skúla.
Hesar báðar vikurnar fara vit at hugsavna okkum um rokning, lesing og skriving. Okkara royndir vísa, at næmingarnir fáa væl burtur úr hesum døgunum.
Vanliga tímatalvan hjá okkum verður sett á pausu hesar dagarnar. Tað vil siga, at vit bara hava føroyskt og rokning
Fyri at tað skal bera okkum til at arbeiða í smáum bólkum í frið og náðum, hava vit skipað dagarnar eftir eini serligari tímatalvu. Tað hevur við sær, at onkur onkuntíð er fyrr liðugur, og onkur flokkur onkuntíð er longri í skúla. Hetta havi eg kunnað frítíðarskúlan um.
Broyttu tímatalvurnar hjá flokkunum verða lagdar út á heimasetningin.
Eru spurningar um rokni – og lesiskeiðið, eru tit vælkomin at venda tykkum til mín á 237133.
Vinaliga Hans Michael í Mittúni, varaskúlastjóri
Sum tit áður eru kunnað um, er grunddeildin á okkara skúla partur av Betri vinir verkætlanini. Aðrir skúlar luttaka eisini og verkætlanin verður framd í samstarvi við Barnabata, Barna- og ústbúgvingarmálaráðið, Undirvísingarstýrið og Nám.
Hetta merkir, at starvsfólkini í teimum yngstu flokkunum hava verið á skeið, har tey hava lært at brúka tilfar og skipa fyri ymiskum virksemi, sum hevur til endamál at skapa góða og trygga floksmentan fyri allar næmingar.
Í hesum sambandi fara vit vit at gera eina kanning av trivnaðinum hjá næmingunum í grunddeild, tað er forskúli, 1., 2. og 3. flokkur. Endamálið við kanningini er at fáa upplýsingar frá næmingunum um, hvussu tey trívast í skúlanum, bæði fakliga og sosialt, so at vit kunnu staðfesta verandi støðu og fylgja við gongdini. Soleiðis kunnu vit brúka tað í okkara víðari arbeiði við Betri vinum og síggja, hvussu verkætlanin eydnast og roynist.
Kanningin er ein spurnakanning við 20 spurningum um teirra skúladag, til dømis um hvussu tey trívast í skúlanum, og hvussu teimum dámar fríkorterini og tímarnar. Næmingarnir verða navnleysir og skulu tí ikki upplýsa navn ella flokk. Hetta er fyri at tryggja, at ongin einstakur næmingur kann “kennast aftur”. Starvsfólk í skúlanum verða inni í flokkinum, meðan spurningarnir verða lisnir fyri børnunum, so at børnini fara at kenna seg trygg og eru saman við góðum og kendum fólki.
Kanningin verður framd nú í vár. Vit fara at greiða næmingunum frá endamálinum við kanningini, hvussu hon fer at fara fram, umframt at hon er sjálvboðin. Vit vóna, at tit lata barn tykkara luttaka, soleiðis at vit fáa eina so góða mynd av samlaðu støðuni í grunddeildini sum møguligt. Um tit ikki ynskja, at barn tykkara skal luttaka í kanningini, kunnu tit geva skúlastjóranum boð um hetta í seinasta lagi 31.01.2024 antin við at senda teldupost ella sms. So skipa vit tað soleiðis, at tykkara barn sleppur at gera okkurt annað, tá kanningin fer fram.
Hava tit spurningar ella ivamál, eru tit vælkomin at venda tykkum til mín.
Blíðar heilsanir
Hans Michael í Mittúni, varaskúlastjóri, 237133
Góðu foreldur og avvarðandi.
Hóskvøldið 18. januar kl. 19.00 verður Betri Vinir-foreldrakvøldið í Løkshøll. Sum eg skrivaði fyri jól, er endamálið við kvøldinum at fáa innlit í trivnaðartilfarið, sum vit nú fara undir at brúka í øllum flokkum í Glyvra skúla. Viðfest er ein nærri frágreiðing av átakinum. Kunnu tit siga flokslæraranum hjá tykkara barni frá, um IKKI ber til at koma. Eru aðrir spurningar, eru tit vælkomin at seta tykkum í samband við meg.
Vinaliga Hans Michael, 237133, varaskúlastjóri
Góðu foreldur og avvarandi..
Glyvra skúli fer í næstum undir eina verkætlan saman við Undirvísingarstýrinum, NÁM og Barna bata, sum hevur til endamáls at styrkja trivnaðararbeiðið á skúlanum. Øll starvsfólkini í Glyvra skúla skulu í hesum sambandi á eitt dagsskeið, sum verður 3. januar. Í hesum sambandi hevur frítíðarskúlin opið allan dagin 3. januar fyri børnunum frá 0. til og við 2. flokk.
Eftir dagsskeiðið 3. januar er meingin, at starvsfólkini á Glyvrum fara at royna nýggja tilfarið og gera sær sínar royndir. Fyri at tryggja, at bæði stór og smá fáa sum mest burtur úr hesum átaki, fara vit regluliga at fáa vitjan av trivnaðarráðgevunum hjá Undirvísingarstýrinum.
Fyri at foreldur og avvarðandi skulu fáa innlit í høvuðstankarnar handan trivnaðartilfarið Betri Vinir, skipa trivnaðarráðgevarnir hjá NÁMi saman við Glyvra skúla fyri einum kunnandi foreldrakvøldi í Løkshøll hóskvøldið 18. januar kl 19.00, hetta skulu vit nokk minna tykkum á, tá ið hetta kvøldið nærkast.
Er annars okkurt at spyrja um hesum viðvíkjandi, eru tit vælkomin at seta tykkum í samband við meg.
Vinaliga Hans Michael í Mittúni, varaskúlastjóri, 237133
Betri vinir!
Vit hava í skúlanum gjøgnumgingið nakrar støður, sum kunnu koma fyri í gerandisdegnum. Børnini eru sera røsk at
koma við boðum um, hvussu og hvat tey meta er skilabest at gera í støðuni.
Eisini hava næmingarnir gjørt reglar fyri flokkin. Her var tað týðiligt, at tey fýra grundvirðini: tolsemi, virðing, umsorgan og dirvi vóru frammalaga í teirra hugaheimi. Hetta er sera gott og haldi eg eisini, at hesi hugtøk koma til sjóndar í relatiónini børnini millum.
Gott hevði verið, um tit halda fram við at taka tráðin upp heima um "Betri vinir". Tað kann vera, at tey minnast reglarnar, sum tey hava gjørt fyri 2.b.