Samrøðubólkur fyri børn í Glyvra skúla

Ásannandi, at tað er tørvur á samrøðubólkum runt í landinum, so fer Glyvra skúli at hava samrøðubólkar fyri børn, hvørs foreldur eru skild. Vit kunnu hervið bjóða næmingum í 1.-3 flokki, hvørs foreldur eru farin hvør til sítt, eitt forum at tosa saman í. Tað er ymiskt, hvussu tað gongur hjá børnunum, hvørs foreldur eru farin hvør til sítt, at fata og góðtaka nýggju støðuna hjá familjuni. Tað vísir seg, at tað eru nógv børn, ið eru tyngd av skilnaðinum hjá foreldrunum, og at tey brúka nógva orku til at stúra og leingjast, og at tað tykist at vera lættari hjá børnunum at skilja og góðtaka sína støðu, tá ið tey kenna seg aftur í tí, sum onnur børn siga frá.

Tað er sjálvandi av størsta týdningi, at bæði foreldrini eru samd um, at teirra barn kann koma í samrøðubólk, og at barnið, við góðari samvitsku yvir fyri báðum foreldrum, kann tosa um sína støðu. Foreldraviðtalur verða áðrenn bólkurin byrjar. Í bólkinum leggja vit stóran dent á tagnarskyldu, og at tey vaksnu ikki spyrja børnini um nøkur nøvn. Heldur kunnu tey spyrja inn til tað ávísa evnið, sum er tikið upp tann dagin. Sum orðið sigur, er ein samrøðubólkur eitt forum, har børnini tosa saman um tankar, kenslur og upplivingar, ið tey hava í felag. Evnini, sum vit fara at hava eru m.a.: kenslur, at tosa um torfør ting, skilnaðurin o.a..

Bólkurin hittist í Glyvra skúla, hvønn mánadag frá 11:50-13:30, í alt 6 ferð. Pláss verður fyri 6 børnum í senn, og tað er ókeypis at luttaka. Tilmeldingarfreistin er 9. jan. Samrøðubólkarnir byrja í viku 5.

Tað vera Unna Hansen heilsufrøðingur og Lív Joensen sj.røkt.fr.og lærari, toymisleiðari í sertilboðnum í skúlanum við Løkin, ið koma at leiða bólkin. Tey, ið vilja vera við, kunnu skriva til unnah@gigni.fo tel 562374 og liv.f.joensen@skulin.fo tel 255048

Næmingar í 1.,2. og 3. flokki fáa ein faldara heim við um samrøðubólkarnar.